Verenantajaksi tuleminen oon helpompaa ko moni luulee. Tässä kerromma miten se tapahtuu, mitä vaaithaan ja mitä ensimäisellä käynilä tapahtuu.
Kuka saattaa antaa verta?
Perusvaatimukset oon ette sie olet terhve, painat vähhiinthään 50 kiloa, olet 18–65-vuotias ko ilmottaut uuena verenantajana ja saatat toistaa henkilölisyytesi. Se joka jo oon verenantaja saattaa jatkaa antamista 75 vuoen ikhään asti. Sie tarttet kans henkilötunuksen ja kyvyn puhua henkilökunnan kansa ruottiksi eli engelskaksi, kospä terhveyskysely pittää ymmärtää oikein.
Muutamat sairauet, lääkheet, matkat, tatuoinit ja raskauet vaativa ootusaikaa ennen antamista. Veripalvelu tekkee aina yksilölisen arvion – älä lannistu vaan kysy rohkeasti.
Ilmottautuminen ja ajanvaraus
Ilmottautumisesta ja ajanvarauksesta huolehtiva alueitten veripalvelut yhtheisen geblod.nu-palvelun kautta. Sieltä sie näet kans missä lähin veripalvelu eli veribussi oon.
Ensimäinen käynti
Ensimäisellä käynilä sie täytät terhveyskyselyn ja puhut sairhaanhoitajan kansa. Sie annat verinäyttheen ette veriryhmä ja veriarvo saahaan määritettyä. Ushein itte antaminen tehhään vasta seuraavala käynilä.
Itte verenanto
Sie saat maata mukavassa tuolissa. Henkilökunta puhistaa kyynärtaipheen ja panhee neulan. Noin 4,5 desilitraa verta keräthään, mikä kestää 5–10 minuuttia. Sen jälkhiin sie leppäät hetken ja saat syötävää ja juotavaa. Varraa yhtheensä noin puoli tuntia.
Antamisen jälkhiin
Juo päivän aikana ylimääräistä nestettä ja vältä kovaa liikuntaa muutaman tunnin ajan. Ruumis palauttaa nestetasapainon vuorokauessa, ko taas punasolut rakenttuva muutaman viikon aikana. Sen tähen naiset saattava antaa noin kolme kertaa ja miehet noin neljä kertaa vuoessa.